25 urte ondoren, Ethan Hawke zuzendari modura itzultzen zen Sundance jaialdira, Texas Outlaw Music mugimenduaren legenda ezezagun Blaze Foley-ren bizitza pantailaratzen duen Blaze (2018) filmarekin. Bestalde, Barbara Miller dokumentalgileak, bost emakumeren kontakizunen bidez, emakumeen sexualitatearen eta plazeraren errealitate konplexuetara hurbiltzen gaitu #Emakumeen plazera (2018) lanean.

Blaze filma Foley-ren berri munduratzeko egon daitekeen modurik ederrenetakoa da. Hawke zuzendariak Sybil Rosen-enekin batera idatzi du gidoia, Rosen-en memorietan oinarrituta hain zuzen ere. Sybil Rosen (Alia Shawkat) Foley-ren maitale eta bere hitzetan, musa ere izan zen. Abeslariak “ile kizkurdun neska txiki eder judua” deitzen zuen. Filma Foley-ren abesti, istorio eta txistez osatuta dago eta Dickey aktoreak bikain antzezten du haren arima konplexua. Abeslariak Atlanta, Chicago, Houston, New Yok eta azkenik Austin-en zehar bidaiatuz izan zuen bizitza ulertzeko, Hawke-k haren heriotzaren ondoren egin zen irratiko elkarrizketa bat erabiltzen du. Kamerari bizkarra emanda, Hawke berak zuzentzen du abeslari zenduaren lagun-min eta lankide izan zen Townes Van Zandt (Charlie Sexton) eta Zee (Josh Hamilton) harmonika jotzaileari eginiko elkarrizketa. Filmak maite du Foley-ren musika eta behin baino gehiagotan haren abestiak osorik entzuten dira. Blaze opari bat da Foley-ren jarraitzaileentzat eta zeu ere bilakatuko zaitu bat oraindik ez bazara haren musikaz maitemindu.

Barbara Millerren #Emakumeen plazera dokumentalak bost emakume ausart, adimentsu eta zehatz aurkezten ditu, gizarte arkaiko eta patriarkalek eta komunitate erlijioso ezberdinek inposatutako isiltasuna apurtzen: Deborah Feldman, komunitate judu ortodoxotik erbesteratutako idazle amerikarra; Leyla Hussein, Somaliako psikoterapeuta, ablazioaren biktima eta ekintzaile soziala; Rokudenashiko, lizunkeriagatik kondenatutako artista japoniarra; Doris Wagner, kleroaren kide batek sexualki bortxatutako moja ohia; eta Vithika Yadav-agatik, Indiako genero-eskubide eta eskubide sexualen aldeko aktibista. #Emakumeen plazera-k egoera unibertsalak azaleratzen ditu, eta emakume horien borroka arrakastatsua erakusten du, sexualitatearen autodeterminazio-eskubidearen alde eta plazer- harreman berdinzaleagoen alde. Emakume horiek hitz egitea erabaki zuten, eta azken adibide dira bizitzarekiko kemenak, indarrak eta gogoak gizarte egiturak nola alda ditzaketen.

Blaze honako jaialdietan egon da besteak beste: Sundance Film Festival 2018; Locarno International Film Festival 2018; American Film Festival 2019; Munich Film Festival 2019. # Emakumeen plazera bere aldetik IDFA 2018; Documentary Festival Thessaloniki 2019; Boston Jewish Festival 2019 o el Festival Cine por Mujeres de Madrid 2019 bezalako jaialdietan ikusi da eta Premio Zonta Club de Locarno Festival (2018) eta Dok Leipzigen (2018) Epaimahai Interlijiosoaren Saria irabazi du besteak beste.